काठमाडौं । सन् २०२६ को दोस्रो त्रैमाससम्ममा विश्वव्यापी स्मार्टफोन बजारको आम्दानी ७ प्रतिशतले बढेर कीर्तिमानी १ खर्ब ९ अर्ब अमेरिकी डलर पुगेको छ । स्मार्टफोनको मूल्य वृद्धि र प्रिमियम स्मार्टफोनप्रति बढ्दो मागका कारण बजारको कूल आम्दानी उल्लेखनीय रूपमा बढेको एक प्रतिवेदनमा उल्लेख गरिएको छ ।
काउन्टरपोइन्ट रिसर्चको प्रतिवेदनअनुसार सन् २०२६ को दोस्रो त्रैमास विश्वव्यापी स्मार्टफोन बजारका लागि इतिहासकै सबैभन्दा धेरै आम्दानी भएको दोस्रो त्रैमास बनेको छ । यस अवधिमा स्मार्टफोनको औसत बिक्री मूल्य (एएसपी) वार्षिक रूपमा १७ प्रतिशतले बढेर कीर्तिमानी ४०० अमेरिकी डलर (६० हजार ८२९ रुपैयाँ) पुगेको छ ।
उपभोक्ताहरूमा प्रिमियम स्मार्टफोन रोज्ने प्रवृत्ति निरन्तर बढ्नुका साथै एन्ड्रोइड स्मार्टफोनमा प्रयोग हुने मेमोरी कम्पोनेन्टको मूल्य बढेकाले विभिन्न एन्ड्रोइड मोडेलहरूको मूल्य पनि बढेको छ । यही कारण स्मार्टफोन बजारको आम्दानीमा पनि उल्लेखनीय वृद्धि भएको प्रतिवेदनले जनाएको छ ।
काउन्टरपोइन्ट रिसर्चका अनुसार स्मार्टफोन उत्पादक कम्पनीहरूले अहिले बिक्री हुने युनिट (शिपमेन्ट) को सङ्ख्या बढाउनुभन्दा प्रत्येक डिभाइसबाट बढी आम्दानी प्राप्त गर्ने रणनीतिलाई प्राथमिकता दिन थालेका छन् । विशेषगरी मेमोरी चिपलगायतका कम्पोनेन्टको मूल्य निरन्तर बढ्दै जाँदा कम्पनीहरूको नाफा मार्जिनमा दबाब परेको छ, जसका कारण उनीहरू उच्च मूल्यका तथा बढी नाफा दिने स्मार्टफोनमा बढी केन्द्रित हुन थालेका हुन् ।
काउन्टरपोइन्ट रिसर्चकी वरिष्ठ विश्लेषक शिल्पी जैनका अनुसार स्मार्टफोन उत्पादक कम्पनीहरूले धेरै युनिट बिक्री गर्ने रणनीतिभन्दा उच्च मूल्यका उत्पादन बिक्री गर्ने रणनीति अपनाउन थालेका छन् । उनीहरूले बढेको कम्पोनेन्ट लागत उपभोक्तामाथि थोपर्दै बढी स्टोरेज भएका मोडेललाई प्राथमिकताका साथ प्रवर्द्धन गर्दै र प्रिमियम स्मार्टफोनको दायरा विस्तार गर्दै आएका छन् ।
उनका अनुसार कम्पनीहरूले किस्ताबन्दी (इन्स्टलमेन्ट) सुविधा, पुरानो फोन साटेर नयाँ लिने (ट्रेड–इन) कार्यक्रम तथा आकर्षक वित्तीय योजनामार्फत स्मार्टफोनलाई थप सहज रूपमा उपलब्ध गराउन थालेका छन् । विशेषगरी उदीयमान बजारहरूमा यस्ता योजनाले महँगा स्मार्टफोनसमेत धेरै उपभोक्ताको पहुँचमा पुग्न मद्दत गरेको छ ।
एप्पलले प्रमुख स्मार्टफोन ब्रान्डहरूमध्ये सबैभन्दा उत्कृष्ट प्रदर्शन गरेको छ । कम्पनीको स्मार्टफोन आम्दानी वार्षिक रूपमा २२ प्रतिशतले बढेको छ भने विश्वव्यापी स्मार्टफोन बजारको आम्दानीमा एप्पलको हिस्सा दोस्रो त्रैमासमा कीर्तिमानी ४९ प्रतिशत पुगेको छ ।
यो वृद्धि मुख्यतः कम्पनीको स्मार्टफोन आपूर्ति (शिपमेन्ट) १३ प्रतिशतले बढ्नुका साथै आइफोन १७ सिरिजप्रति उपभोक्ताको माग निरन्तर उच्च रहनुले सम्भव भएको प्रतिवेदनमा उल्लेख गरिएको छ ।
सामसुङ विश्वव्यापी स्मार्टफोन आम्दानीको १६ प्रतिशत हिस्सासहित दोस्रो स्थानमा रहेको छ । कम्पनीको आम्दानी र स्मार्टफोन शिपमेन्ट दुवै वार्षिक रूपमा ९ प्रतिशतले बढेको प्रतिवेदनमा उल्लेख छ । सामसुङको ग्यालेक्सी ए–सिरिजका स्मार्टफोन तथा फ्ल्यागशिप मोडेलहरूको बलियो मागका कारण कम्पनीले यस्तो वृद्धि हासिल गर्न सफल भएको हो ।
अन्य प्रमुख स्मार्टफोन ब्रान्डमध्ये साओमीको आम्दानी वार्षिक रूपमा १७ प्रतिशतले घटेको छ । त्यस्तै ओप्पो र भिभोको आम्दानी क्रमशः १० प्रतिशत र ११ प्रतिशतले घटेको प्रतिवेदनमा उल्लेख छ । इन्ट्री लेभल र मिड रेन्जका स्मार्टफोनको शिपमेन्ट कमजोर रहँदा मूल्य बढाए पनि त्यसको प्रभाव आम्दानीमा सकारात्मक रूपमा पर्न नसकेको प्रतिवेदनले जनाएको छ ।
