एप्पलको नयाँ 'अल्ट्रा' सिरिज: तीन नयाँ डिभाइस आउँदै
टेक जायन्ट एप्पलले आगामी ६ देखि ७ महिनाभित्र ‘अल्ट्रा’ ब्रान्डिङ अन्तर्गत तीन वटा नयाँ प्रिमियम प्रडक्टहरू बजारमा ल्याउने तयारी गरिरहेको छ। ब्लुमबर्गका मार्क गुरम्यान र म्याकवर्ल्डका फिलिप एस्पोसिटोको पछिल्लो रिपोर्ट अनुसार कम्पनीले आफ्नो प्रडक्ट लाइनअपलाई अझ परिस्कृत गर्दै नयाँ प्रविधि समावेश गर्न लागेको हो।
पहिलो फोल्डेबल 'आईफोन अल्ट्रा'
एप्पलको बहुप्रतिक्षित पहिलो फोल्डेबल फोनलाई ‘आईफोन अल्ट्रा’ नाम दिइने प्रबल सम्भावना रहेको छ। प्राप्त जानकारी अनुसार यो डिभाइसमा ७.७ इन्चको भित्री डिस्प्ले र ५.३ इन्चको बाहिरी डिस्प्ले रहनेछ। यसमा दुई वटा रियर क्यामरा र एउटा फ्रन्ट क्यामरा राखिनेछ। सेक्युरिटीका लागि फेस आईडीको सट्टा पावर बटनमै टच आईडी उपलब्ध गराइने बताइएको छ।
यो नयाँ मोडल आगामी सेप्टेम्बर महिनामा आईफोन १८ प्रो र आईफोन १८ प्रो म्याक्सका साथ सार्वजनिक हुन सक्ने अनुमान छ। अमेरिकी बजारमा यसको सुरुवाती मूल्य १,९९९ डलरदेखि २,४९९ डलरसम्म कायम हुने अपेक्षा गरिएको छ।
क्यामरासहितको 'एयरपड्स अल्ट्रा'
आईफोन अल्ट्राका साथै यसै वर्षको सेप्टेम्बरमा एप्पलले क्यामरा जडान गरिएको ‘एयरपड्स अल्ट्रा’ पनि बजारमा ल्याउने तयारी गरेको छ। यो एयरपड्स हेर्दा एयरपड्स प्रो जस्तै देखिने भए तापनि यसमा साना इन्फ्रारेड क्यामराहरू हुनेछन्। यी क्यामराहरूले एप्पलको भर्चुअल असिस्टेन्ट ‘सिरी’ का लागि आँखाको रूपमा काम गर्नेछन्।
यसले आईफोन १५ प्रो र त्योभन्दा नयाँ मोडलहरूमा उपलब्ध ‘भिजुअल इन्टेलिजेन्स’ फिचरलाई अझ प्रभावकारी बनाउनेछ। क्यामरा सक्रिय भएको समयमा एयरबड्समा सानो एलइडी लाइट बल्नेछ। आईओएस २७ को क्यामरा एपभित्र रहने नयाँ ‘सिरी’ मोडमार्फत प्रयोगकर्ताले हेरिरहेको वस्तुबारे सिरीलाई सोध्न सक्ने ह्यान्ड्स-फ्री सुविधा पाउनेछन्। आईओएस २७ को दोस्रो डेभलपर बिटा कोडमा पनि यसको संकेत पाइएको छ।
टचस्क्रिनयुक्त 'म्याकबुक अल्ट्रा'
एप्पलको तेस्रो अल्ट्रा प्रडक्टको रूपमा ओएलईडी टचस्क्रिन भएको ‘म्याकबुक अल्ट्रा’ आउने दाबी गरिएको छ। विश्लेषक मार्क गुरम्यानका अनुसार यो नयाँ म्याकबुक सन् २०२७ को सुरुवाती समयसम्ममा सार्वजनिक हुन सक्छ।
यस म्याकबुकमा एम५ प्रो र एम५ म्याक्स चिप, डाइनामिक आइल्यान्ड र हालको म्याकबुक प्रोभन्दा पातलो डिजाइन रहनेछ। साथै, यसमा इन-बिल्ट ५जी/एलटीई सेलुलर कनेक्टिभिटीका लागि एप्पलले आफ्नै ‘सी-टु’ मोडेम प्रयोग गर्न सक्ने अनुमान गरिएको छ।
