काठमाडौं । एप्पलले करिब दुई महिना अघि आफ्ना विभिन्न उत्पादनको मूल्य बढाउने घोषणा गर्दा आईफोन भने अछुतो रहेको थियो । तर, म्याकबुक र आईप्याडमा जस्तै अब एप्पलले आईफोनको मूल्य पनि बढाउने तयारी गरिरहेको देखिएको छ । कम्पनीले आगामी आईफोन १८ सिरिज सार्वजनिक भएपछि मात्र मूल्य समायोजन गर्ने योजना बनाएको हुन सक्ने अनुमान गरिएको छ । आईफोन १८ सिरिज आगामी महिना सार्वजनिक हुने लगभग निश्चित छ ।
ब्लुमबर्गका एप्पल एक्स्पर्ट मार्क गुरम्यानका अनुसार एप्पल अहिले आईफोनको मूल्य बढाउने तयारीमा छ । एप्पलका सार्वजनिक नभएका उत्पादनसम्बन्धी समाचारका लागि विश्वसनीय स्रोत मानिने गुरमनले ब्लुमबर्गमा लेख्दै कम्पनीले मूल्य वृद्धि गर्ने तयारी गरिरहेको बताएका हुन् ।
यद्यपि, आईफोनको मूल्य कति बढाउने भन्नेबारे एप्पलले अझै निर्णय गरिसकेको छैन । गुरमनका अनुसार कम्पनी अहिले मूल्य वृद्धिको स्तर निर्धारण गर्ने प्रक्रियामा छ ।
आईफोनको मूल्य बढ्ने सम्भावना पछिल्ला केही महिनादेखि नै देखिँदै आएको छ । विश्वव्यापी रूपमा जारी मेमोरी चिपको अभावले उत्पादन लागतमा उल्लेख्य वृद्धि गरेको छ । यसको प्रभावस्वरूप प्रविधि क्षेत्रमा स्मार्टफोन र ल्यापटपको मूल्य बढाउने क्रमसमेत देखिएको छ ।
गुरमनका अनुसार एप्पलले आफ्ना स्मार्टफोनबाहेकका उत्पादनको मूल्य पनि फरक-फरक दरमा बढाएको छ । आईप्याड एयरको मूल्य १५० डलर, म्याकबुक एयरको २०० डलर र म्याक स्टुडियोको मूल्य ५०० डलरले बढाइएको थियो ।
आईफोनको हकमा पनि एप्पलले उल्लेख्य मूल्य वृद्धि गर्न सक्ने अनुमान गरिएको छ । यसको एउटा कारण आईफोन प्रयोगकर्ताहरू एप्पलको आईओएस इकोसिस्टममा गहिरोसँग जोडिइसकेको कम्पनीको बुझाइ हुन सक्छ । यही कारण मूल्य उल्लेख्य रूपमा बढाए पनि ठुलो संख्यामा ग्राहक गुमाउनु नपर्ने एप्पलको आकलन हुन सक्ने देखिन्छ ।
यद्यपि एप्पलले अन्य कम्पनीका उपकरणसँग पनि प्रतिस्पर्धा गर्नुपर्ने हुन्छ । सामसङ र गुगललले आफ्ना नयाँ ग्यालेक्सी र पिक्सेल सिरिजका स्मार्टफोनको मूल्य करिब १०० डलर (१५ हजार रुपैयाँ) ले मात्र बढाएका छन् । फोल्डेबल फोनको हकमा भने मूल्य वृद्धि सामान्यतया योभन्दा निकै ठुलो हुने गरेको छ ।
त्यसैले एप्पलले पनि प्रतिस्पर्धीको मूल्य वृद्धिलाई ध्यानमा राख्दै त्यही स्तरमा मूल्य बढाउन वा कम्तीमा त्यसकै आसपास राख्नुपर्ने हुन सक्छ । यस्तो भएमा आईफोन १८ प्रोको आधारभूत मोडेलको सुरुवाती मूल्य करिब १,१९९ डलर (१ लाख ८३ हजार रुपैयाँ) पुग्न सक्छ ।
यसका अतिरिक्त, गुरम्यानका अनुसार एप्पलले आफ्ना प्रतिस्पर्धीको तुलनामा अझ ठुलो मूल्य वृद्धि गर्न सक्ने आधारका रूपमा कम्पनीको नयाँ ‘एप्पल अपग्रेड’ कार्यक्रमलाई पनि लिन सक्छ ।
‘एप्पल अपग्रेड’ मूलतः लिजिङ मोडल हो । यसमा एप्पलका प्रयोगकर्ताले उपकरणका लागि नियमित मासिक शुल्क तिर्न सक्छन् र नयाँ मोडल सार्वजनिक भएपछि पुरानो उपकरण सजिलै फिर्ता गरेर नयाँ उपकरणमा अपग्रेड गर्न सक्छन् ।
आईफोनको मूल्य बढेमा मूल्य वृद्धिका कारण पहिले खरिद गर्न नसक्ने अवस्थामा पुग्ने प्रयोगकर्ताले पनि एप्पल अपग्रेड कार्यक्रममार्फत मासिक शुल्क तिरेर आईफोन प्रयोग गर्ने विकल्प रोज्न सक्नेछन् ।
फोल्डेबल आईफोन अल्ट्रा र आईफोनको सम्भावित मूल्य वृद्धिसम्बन्धी सबै प्रश्नको जवाफ भने एप्पलको आगामी सेप्टेम्बर कार्यक्रममा मिल्ने सम्भावना छ । एप्पलले नयाँ आईफोन सिरिज सार्वजनिक गर्ने उक्त कार्यक्रममा मूल्यसम्बन्धी आफ्नो योजना पनि स्पष्ट पार्न सक्नेछ । तर आईफोनको मूल्य बढ्ने निश्चित जस्तै छ ।
