काठमाडौं । हरेक वर्ष एप्पलले नयाँ आईफोन सार्वजनिक गर्ने समय नजिकिँदै गर्दा प्रविधि प्रेमीमाझ एउटै प्रश्न उठ्ने गर्छ - बजारमा उपलब्ध पछिल्लो मोडेल किन्ने कि नयाँ पुस्ताको आईफोन सार्वजनिक हुने समयसम्म पर्खने ?
आगामी महिना एप्पलले आफ्नो नयाँ र बहुप्रतीक्षित आईफोन १८ प्रो बजारमा ल्याउने तयारी गरिरहेको छ । यस्तो अवस्थामा धेरै मानिसहरू अहिले नै आईफोन १७ प्रो किन्ने वा नयाँ आईफोन १८ प्रो सार्वजनिक नभएसम्म पर्खने भन्ने दोधारमा परेका छन् ।
सामान्यतया नयाँ मोडेल सार्वजनिक हुन लागेको अवस्थामा केही हप्ता पर्खिएर नयाँ फोनमा आउने प्रविधि हेरेर मात्र खरिदको निर्णय लिन सुझाव दिइन्छ । तर यस वर्षको परिस्थिति अलि फरक देखिएकाले सुझाव पनि बदलिएको छ ।
यस वर्षको सुझाव फरक हुनुको मुख्य र सबैभन्दा बलियो कारण सम्भावित मूल्य वृद्धि हो । बजारमा सार्वजनिक भएका विभिन्न विश्वसनीय रिपोर्ट, हल्ला र संकेतलाई आधार मान्दा आईफोन १८ प्रो र १८ प्रो म्याक्सको मूल्य विगतका मोडेलभन्दा निकै महँगो हुने अनुमान गरिएको छ ।
नयाँ आईफोन १८ प्रोको सुरुवाती मूल्य पहिलेको तुलनामा २०० देखि ३०० डलरसम्म बढ्न सक्ने आँकलन गरिएको छ । जसअनुसार आईफोन १८ प्रोको सुरुवाती मूल्य १,२९९ डलरदेखि १,३९९ डलरसम्म पुग्न सक्छ । यो अहिलेको आईफोन १७ प्रोको १,०९९ डलरको सुरुवाती मूल्यभन्दा निकै बढी हो । त्यसैगरी, आईफोन १८ प्रो म्याक्सको सुरुवाती मूल्य १,३९९ डलरदेखि १,४९९ डलरसम्म पुग्ने अनुमान गरिएको छ, जुन अहिलेको मोडेलको १,१९९ डलरको सुरुवाती मूल्यभन्दा माथि हो ।
यही सम्भावित मूल्य वृद्धिलाई मध्यनजर गर्दै नयाँ फोन किन्ने योजनामा रहेका प्रयोगकर्ताका लागि अहिले नै आईफोन १७ प्रो किन्नु सबैभन्दा बुद्धिमानी र आर्थिक रूपमा फाइदाजनक निर्णय हुन सक्छ । आईफोन १८ प्रोमा अतिरिक्त २०० देखि ३०० डलर खर्च गर्नुपर्ने गरी ठुलो वा क्रान्तिकारी अपग्रेड नहुने अनुमान गरिएको छ। विशेषगरी यदि तपाईं दुई वा तीन वर्षभन्दा पुरानो आईफोन प्रयोग गरिरहनुभएको छ र नयाँ प्रविधिमा अपग्रेड हुन चाहनुहुन्छ भने, आईफोन १७ प्रो नै तपाईंको लागि एक पर्याप्त अपग्रेड साबित हुने विश्लेषकहरूले जनाएका छन् ।
विचार गर्नुपर्ने अर्को महत्त्वपूर्ण पक्ष के हो भने एप्पलले नयाँ आईफोन १८ प्रो सार्वजनिक गर्ने बित्तिकै आईफोन १७ प्रोको बिक्री आधिकारिक रूपमा बन्द गर्नेछ । यद्यपि यो फोन अन्य तेस्रो-पक्ष बिक्रेतासँग केही समयसम्म उपलब्ध हुन सक्छ । तर त्यस बेला पनि यसको मूल्य अहिलेको भन्दा कम हुने सम्भावना निकै न्यून रहन्छ ।
भविष्यको सुरक्षा र फोनको आयुका आधारमा आईफोन १८ तर्फ ध्यान केन्द्रित भएको हुन सक्छ । तर, विश्वसनीय स्रोतबाट आएको रिपोर्ट का अनुसार आईफोन १८ प्रोमा पनि आईफोन १७ प्रो जस्तै १२ जीबी र्याम प्रयोग गरिनेछ । यसको सीधा अर्थ के हो भने आईफोन १७ प्रोले पनि आगामी धेरै वर्षसम्म नयाँ आईओएस अपडेट र एआई सुविधा सहज रूपमा प्राप्त गरिरहनेछ । यसले गर्दा यो फोन लामो समयसम्म पुरानो महसुस हुने छैन ।
नयाँ आउन लागेको आईफोन १८ प्रोमा के-कस्ता परिवर्तन हुन सक्छन् भन्ने कौतुहलता हुनु स्वाभाविक नै हो । बाहिरिएका रिपोर्टका अनुसार यसमा नयाँ ए२० प्रो प्रोसेसर राखिनेछ जसले फोनको फर्फमेन्ट र ब्याट्रीको आयुलाई अझ राम्रो बनाउनेछ । यसको मुख्य क्यामेरामा ‘भ्यारियबल एपर्चर’ प्रविधिको प्रयोग हुन सक्छ । यसको सहायताले प्रयोगकर्ताले फोटो खिच्दा ब्याकग्राउन्ड कति धमिलो वा स्पष्ट राख्ने भन्ने कुरा सजिलै नियन्त्रण गर्न सक्नेछन् ।
यसका साथै यो फोन लाइट ब्लु, सिल्भर र डार्क चेरी जस्ता नयाँ कलर भेरियरन्टमा उपलब्ध हुने सम्भावना रहेको छ । डिजाइनको कुरा गर्दा यसको फ्रन्ट स्क्रिनमा रहेको डाइनामिक आइल्यान्डको आकार अलि सानो बनाइनेछ भने आईफोन १८ प्रो म्याक्स पहिलेको मोडेलभन्दा अलि बाक्लो र गह्रौ हुने अनुमान गरिएको छ । यसमा स्याटेलाइटमार्फत फाइभजी चल्ने सी-टु मोडेम जस्ता नयाँ कनेक्टिभिटी प्रविधि पनि थपिन सक्छ ।
यद्यपि एप्पलले यी अनुमानित फिचरबाहेक केही थप कुरा पनि ल्याउन सक्छ । तर सामान्य प्रयोगकर्ताका लागि ती फिचरका लागि धेरै पैसा बढी तिर्नु आवश्यक नहुन सक्छ । तर यस सुझावमा एउटा सानो सर्त पनि जोडिएको छ जुन हालै बाहिरिएको नयाँ हल्लामा आधारित छ । बाहिरिएका रिपोर्टका अनुसार एप्पलले आगामी हप्ता नै आईफोन १७ को मूल्य केही बढाउन सक्ने सम्भावना छ । यदि वास्तवमै त्यस्तो भयो भने यो सुझाव परिवर्तन हुन सक्छ । तर जबसम्म हालको मूल्य स्थिर रहन्छ तबसम्म अहिले नै आईफोन १७ प्रो किन्नु नै बढी बुद्धिमानी हुनेछ ।
नेपालमा आईफोन १७ प्रो म्याक्सको मूल्य हालै मात्र १५ हजार रुपैयाँसम्मले घटेको छ ।
