अनरका नयाँ 'एक्स६डी' र 'एक्स५डी सिरिज' स्मार्टफोन नेपाली बजारमा, ०% ईएमआईमा सुविधा

काठमाडौं । अनर नेपालले अनर एक्स५डी (HONOR X5d) सिरिज र अनर एक्स६डी (HONOR X6d) नेपाली बजारमा सार्वजनिक गरेको छ । कम्पनीका अनुसार नयाँ स्मार्टफोनमा आकर्षक डिजाइन, ठुलो ब्याट्री, पर्याप्त स्टोरेज र दैनिक प्रयोगका लागि आवश्यक विभिन्न सुविधा सहित यी स्मार्टफोनहरू सार्वजिनक भएका हुन् ।

यस्तै, कम्पनीले बजेट स्मार्टफोनमा पहिलो पटक ० प्रतिशत ईएमआई सुविधा उपलब्ध रहेकाे जनाएकाे छ । यसअन्तर्गत ग्राहकले बिनाब्याज मासिक किस्तामा अनरका नयाँ स्मार्टफोन खरिद गर्न सक्नेछन् । कम्पनीले यसबाट एकैपटक ठुलो रकम खर्च गर्न नसक्ने ग्राहकलाई पनि नयाँ प्रविधियुक्त स्मार्टफोन खरिद गर्न सहज हुने अपेक्षा गरेको छ ।

HONOR X5d सिरिजमा ५,२६० एमएएच ब्याट्री दिइएको छ । यसले दिनभर फोन प्रयोग गर्न पर्याप्त ब्याकअप दिने कम्पनीको दाबी छ । फोनले १५ वाट चार्जिङ सपोर्ट गर्छ भने बक्समै १५ वाटको पावर एडाप्टर उपलब्ध गराइएको छ ।

फोटोग्राफीका लागि सिरिजमा ५० मेगापिक्सेलको मुख्य क्यामरा दिइएको छ । त्यस्तै, १२८ जीबीसम्मको स्टोरेज उपलब्ध छ । HONOR X5d मा ४ जीबी र्‍याम तथा ६४ जीबी स्टोरेज र X5d Plus मा ४ जीबी र्‍याम तथा १२८ जीबी स्टोरेज दिइएको छ ।

नेपालमा HONOR X5d को मूल्य २५ हजार ४९९ रुपैयाँ र HONOR X5d Plus को मूल्य २८ हजार ९९९ रुपैयाँ तोकिएको छ।

HONOR X5d सिरिजसँगै कम्पनीले HONOR X6d पनि सार्वजनिक गरेको छ । यसमा २५६ जीबीसम्मको स्टोरेज उपलब्ध रहेको कम्पनीले जनाएको छ ।

यो फोनमा पनि ५,२६० एमएएच ब्याट्री र १५ वाट स्ट्यान्डर्ड चार्जिङ दिइएको छ । फोटोग्राफीका लागि ५० मेगापिक्सेलको मुख्य क्यामरा राखिएको छ ।

यसमा मिडियाटेक डाइमेन्सिटी ६३०० प्रोसेसर र ६.७५ इन्चको टीएफटी एलसीडी डिस्प्ले रहेको छ । फोनको मोटाइ ७.९ मिलिमिटर रहेको कम्पनीले जनाएको छ । यसको ४ जीबी र्‍याम र १२८ जीबी स्टोरेज भेरियन्टको मूल्य २९ हजार ९९९ रुपैयाँ तोकिएको छ ।

HONOR X5d सिरिज र HONOR X6d नेपालभरका अधिकृत अनर रिटेल स्टोरहरूमा उपलब्ध रहेको कम्पनीले जनाएको छ ।