काठमाडौं । चिनियाँ स्मार्टफोन ब्रान्ड अनरले रोबोट फोन सार्वजनिक गरेको छ । कम्पनीले नाममा प्रयोग गरेको ‘रोबोट’ शब्दले विशेषगरी स्वचालित रूपमा बाहिर निस्कने क्यामेरा गिम्बललाई जनाउँछ । अर्थात, यो फोनको पछाडिको भागबाट क्यामेरा बाहिर निस्किन्छ र स्वचालित रूपमा विभिन्न दिशाबाट तस्बिर तथा भिडिओ खिच्न सक्छ ।
टाइटेनियमबाट बनेको यो गिम्बल विभिन्न दिशामा चल्न सक्छ । साथै, ३६० डिग्रीसम्म पूर्ण रूपमा घुम्न सक्ने क्षमता पनि रहेको छ । यसले सामान्य स्मार्टफोनबाट खिच्न कठिन हुने दृश्यहरूलाई पनि सहज रूपमा क्यामेरामा कैद गर्न सकिने बनाउँछ । गिम्बलका कारण टिल्ट लक, एफपीभी भ्यु, स्पिनसट लगायतका विभिन्न सिनेमाटिक मुभमेन्ट मोडहरूमा दृश्य खिच्न सकिन्छ ।
फोनमा सब्जेक्ट ट्र्याकिङका लागि एआई एल्गोरिदम एकीकृत गरिएको छ । यसले कुनै व्यक्तिलाई पछ्याउनका लागि क्यामेरालाई स्वचालित रूपमा प्यान र टिल्ट गर्न सक्छ । त्यस्तै, यसमा हातले इशारा गरेर क्यामेराको आर्म बाहिर निकाल्न तथा फोटो वा भिडियो खिच्न ह्यान्ड्स फ्री जेस्चर कन्ट्रोल सुविधा पनि रहेको छ ।
रोबोट फोनको रियर क्यामेरा सेटअपमा डुअल २०० मेगापिक्सेल क्यामेरा प्रणाली रहेको छ । जसमा २०० मेगापिक्सेलको मुख्य क्यामेरा र २०० मेगापिक्सेलको टेलिफोटो क्यामेरा रहेका छन् । अनरले प्रोफेसनल क्यामेरा निर्माण गर्ने कम्पनी एरी (ARRI) सँग पनि साझेदारी गरेको छ । यो सहकार्यले नयाँ पुस्ताका भिडियोग्राफरलाई थप उपयोगी उपकरण उपलब्ध गराउने कम्पनीको दाबी छ । यसमा एआई सहायता प्राप्त न्वाइज रिडक्सन जस्ता सुविधा पनि समावेश छन् ।
त्यस्तै, खिचिएको भिडियोको रियल टाइम प्रिभ्यु हेर्न सकिन्छ भने फुटेजलाई र (RAW) फाइलका रूपमा पनि आउटपुट गर्न सकिन्छ । यो फोन MagicOS मा चल्ने र यसमा योयो रोबोट मोड (YOYO Robot Mode) नामको नयाँ सुविधा पनि ल्याइएको कम्पनीले जनाएकाे छ । यसले सन्दर्भ बुझ्ने क्षमता, जेस्चर पहिचान र भौतिक गतिविधिलाई एकै ठाउँमा जोड्छ । अर्थात, यो फोनको क्यामेरा गिम्बललाई केही हदसम्म मानवजस्तै व्यवहार गर्न सक्ने बनाइएको छ ।
गत मार्चमा गरिएको एक डेमोमा यसले प्रयोगकर्ताको प्रत्यक्ष नियन्त्रणबिना सङ्गीतको तालमा नाच्ने, सहमति जनाएजस्तो गरी टाउको हल्लाउने र आदेश दिँदा आफ्नो शरीर घुमाउनेजस्ता गतिविधि प्रदर्शन गरेको थियो ।
अनरले यो प्लेटफर्म थर्ड पार्टी डेभलपरहरूका लागि पनि खुला गर्ने जनाएको छ । यसले डेभलपरहरूलाई फोनको बहुआयामिक क्षमताको प्रयोग गरेर नयाँ प्रकारका सुविधा र अनुभव विकास गर्ने अवसर दिनेछ । कम्पनीका अनुसार डेभलपरहरूले फोनको गिम्बल, वातावरण तथा वस्तु पहिचान क्षमता र भौतिक रूपमा प्रतिक्रिया जनाउन सक्ने प्रविधि प्रयोग गरेर नयाँ अनुभवहरू सिर्जना गर्न सक्नेछन् ।
अनरको रोबोट फोनमा स्न्यापड्रागन इलाइट जेन ५ (Snapdragon Elite Gen 5) चिपसेट प्रयोग गरिएको छ । यसमा फोनको तापक्रम नियन्त्रणका लागि विशेष रूपमा विकास गरिएको कस्टम कुलिङ सिस्टम पनि राखिएको छ । फोनमा ७,०६० एमएएच क्षमताको ब्याट्री दिइएको छ ।
डिस्प्लेतर्फ यसमा ६.३ इन्चको OLED स्क्रिन रहेको छ, जसले एडाप्टिभ रिफ्रेस रेट सपोर्ट गर्छ । यसको अधिकतम ब्राइटनेस ६,८०० निट्ससम्म पुग्ने कम्पनीले जनाएको छ । रोबोट फोन अहिले दुई कन्फिगरेसनमा उपलब्ध रहेको छ । एउटा मोडलमा १२ जीबी र्याम र ५१२ जीबी स्टोरेज छ भने अर्कोमा १६ जीबी र्याम र १ टीबी स्टोरेज उपलब्ध छ । हालका लागि अनर रोबोट फोन चीनमा मात्र उपलब्ध रहेको छ । कम्पनीका अनुसार यसको आधिकारिक बिक्री अगस्ट १८ देखि सुरु हुनेछ । चीनमा १२ जीबी र्याम भएको फोनको मूल्य ९,९९९ युआन (२ लाख २६ हजार रुपैयाँ) र १६ जीबीको १२,९९९ युआन (२ लाख ९३ हजार रुपैयाँ)
