काठमाडौं । सामसङले नेपाली बजारमा आफ्नो नयाँ उत्पादन ‘ग्यालेक्सी जेड फोल्ड ८’ सिरिज सार्वजनिक गरेको छ । राजधानीमा बिहीबार आयोजित एक कार्यक्रममार्फत कम्पनीले ग्यालेक्सी जेड फोल्ड ८ अल्ट्रा, ग्यालेक्सी जेड फोल्ड ८ र ग्यालेक्सी जेड फ्लिप ८ सहित ग्यालेक्सी वाच ९ र ग्यालेक्सी वाच अल्ट्रा २ बजारमा ल्याएको हो ।
आठौँ पुस्ताका यी फोल्डेबल फोनमा डिजाइन, टिकाउपन र सफ्टवेयरको क्षेत्रमा व्यापक सुधार गरिएको कम्पनीले जनाएको छ ।
ग्यालेक्सी जेड फोल्ड ८ र अल्ट्रामा भएका ठुला डिस्प्लेले एउटै स्क्रिनमा एपहरू परिवर्तन नगरी कामको समीक्षा, तुलना र नयाँ सिर्जना गर्न सहज बनाउने बताइएको छ ।
यस्तै, जेड फ्लिप ८ ले छिटो एआई अन्तरक्रिया र रचनात्मक अनुभव प्रदान गर्नेछ भने नयाँ ग्यालेक्सी वाच लाइनअपले स्वास्थ्य र तन्दुरुस्ती (वेलनेस) सम्बन्धी सेवालाई थप प्रभावकारी बनाउने बताइएको छ ।
मूल्यमा मात्र केन्द्रित नभई यो सिरिजलाई सुलभता र कनेक्टेड ओनरशिपमा जोड दिइएको कम्पनीको भनाइ छ ।
नेपाली उपभोक्ताको क्रयशक्तिलाई ध्यानमा राख्दै सामसङले खरिद प्रक्रियालाई निकै सहज बनाएको छ । हुलास फिन सर्भमार्फत ४० प्रतिशत डाउन पेमेन्ट गरी २४ महिनाको ईएमआईमा फोन खरिद गर्न सकिनेछ ।
योग्य उच्चस्तरीय ग्राहकका लागि भने २० प्रतिशत मात्र डाउन पेमेन्ट गरेर ३६ महिनासम्मको ईएमआई सुविधा उपलब्ध गराउने लक्ष्य राखिएको छ ।
यसका साथै, पुराना फोन साट्न चाहनेका लागि ट्रेड-इन बोनस र रेमिट्यान्ससँग जोडिएको नगद फिर्ता योजनाले उपभोक्तालाई थप आर्थिक राहत प्रदान गर्नेछ ।
कम्पनीले आईएमएस र हिम इलेक्ट्रोनिक्ससँगको सहकार्यमा ग्राहकका लागि ‘डिजिटलदेखि रिटेलसम्म’ सहज यात्राको व्यवस्था मिलाएको छ । ग्राहकले डिजिटल केवाईसी र रेमिट्यान्स प्रमाणीकरणमार्फत घरैबाट वा स्टोरमा गएर सहजै फोन खरिद गर्न सक्नेछन् ।
दिगोपनको क्षेत्रमा काम गर्दै सामसङले ‘अप्कुडो’ (Apkudo) सँग मिलेर पुराना उपकरणहरूको उचित मूल्य दिने र तिनलाई मर्मत गरी पुनः प्रयोगमा ल्याउने नीति लिएको छ । यसले ई-वेस्ट घटाउन र वातावरण संरक्षणमा समेत योगदान पुर्याउने विश्वास गरिएको छ ।
सामसङले एनसेल, इसेवा र विभिन्न वित्तीय साझेदारहरूलाई एउटै इकोसिस्टममा जोडेर ग्राहकलाई एकीकृत सेवा दिने लक्ष्य राखेको छ ।
सामसङ नेपालका प्रबन्ध निर्देशक चाङ उक जङले भने, “परम्परागत स्मार्टफोनले एआईका लागि एउटा झ्यालको मात्र काम गर्छ भने फोल्डेबल फोनले पूर्ण वर्कस्टेशन नै प्रदान गर्छ ।” उनले सामसङको लक्ष्य नेपालमा केवल सामान बिक्री गर्नु मात्र नभई यहाँका युवाहरूलाई कोडिङ र एआई जस्ता क्षेत्रमा दक्ष बनाई क्षमता विकास गर्नु रहेको पनि बताए ।
कम्पनीले नयाँ सिरिजका लागि प्रि-अर्डर पनि खुला गरेको छ । बिहीबारदेखि स्टक रहुञ्जेलसम्मका लागि भीआईपी र सामान्य गरी दुई प्रकारका प्रि-अर्डर प्याकेज ल्याइएको छ ।
भीआईपी प्याकेज अन्तर्गत ग्राहकले ६८ हजार रुपैयाँसम्मको फाइदा लिन सक्नेछन्, जसमा दुई वर्षको निःशुल्क एनसेल डेटा र भ्वाइस प्याक, १५ हजार रुपैयाँ एक्सचेन्ज बोनस, ग्यालेक्सी वाचमा १० हजार छुट र १८ हजार ३५१ रुपैयाँ बराबरको गुगल एआई प्रो ६ महिनाका लागि निःशुल्क उपलब्ध हुनेछ ।
यस्तै, ५८ हजार रुपैयाँसम्मको लाभ पाइने सामान्य प्याकेजमा पनि आकर्षक सुविधाहरू समावेश गरिएको कम्पनीले जनाएको छ । दुवै प्याकेजमा निःशुल्क फोन कभर र दुई वर्षको थप वारेन्टीको व्यवस्था गरिएको छ ।
