लन्च तालिकामा ऐतिहासिक परिवर्तन
एप्पलले वर्षौंदेखि चल्दै आएको आफ्नो परम्परा तोड्दै आगामी आईफोन १८ सिरिजको लन्च तालिकामा ठूलो फेरबदल गर्ने तयारी गरेको छ। कम्पनीको मुख्य आपूर्तिकर्ता पेगाट्रोन (Pegatron) बाट प्राप्त विवरण अनुसार, पार्टपुर्जाको विश्वव्यापी अभावका कारण एप्पलले नयाँ स्मार्टफोन बिक्री र डेलिभरी समयतालिका संशोधन गरेको हो।
विगतमा आईफोन ११ देखि आईफोन १७ सम्मका सबै मोडेलहरू सेप्टेम्बर महिनामै एकैसाथ सार्वजनिक हुने गर्दथे। तर यसपटक भने प्रिमियम आईफोन १८ प्रो र आईफोन १८ प्रो म्याक्स मात्र सेप्टेम्बरमा सार्वजनिक हुनेछन्। आधारभूत अर्थात् स्ट्यान्डर्ड आईफोन १८ खरिद गर्न चाहने उपभोक्ताले भने सन् २०२७ को पहिलो त्रैमासिकसम्म पर्खिनुपर्ने भएको छ। यसअघि सन् २०२० मा महामारीका कारण आईफोन १२ को सार्वजनिक मिति अक्टोबरमा धकेलिएको भए पनि एउटै सिरिजका फोनहरू महिनौँको अन्तरालमा लन्च हुन लागेको यो पहिलो पटक हो।
चिप अभाव र नाफा जोगाउने रणनीति
कम्पनीले यस्तो कदम चाल्नुको मुख्य कारण इलेक्ट्रोनिक कम्पोनेन्ट र मेमोरी चिपको उच्च अभाव हो। ताइवानको इकोनोमिक डेली न्युज र म्याक रुमर्सका अनुसार एआई सर्भरहरूको माग ह्वात्तै बढेकाले सेमिकन्डक्टर र मेमोरी चिपको आपूर्तिमा दबाब परेको छ।
सीमित पार्टपुर्जा उपलब्ध भएकाले एप्पलले उच्च नाफा (मार्जिन) दिने महँगा प्रो मोडेलहरूलाई प्राथमिकता दिएको छ। बढी मूल्यका प्रो मोडेलमा सामग्री प्रयोग गर्दा कम्पनीको आम्दानी सुरक्षित गर्न र आपूर्ति व्यवस्थापन लचिलो बनाउन मद्दत पुग्ने विश्लेषण गरिएको छ।
सेप्टेम्बर इभेन्ट र पहिलो फोल्डेबल आईफोन
ब्लुमबर्ग र फोर्ब्सका अनुसार एप्पलको ठूलो सेप्टेम्बर इभेन्ट आगामी सेप्टेम्बर ९ मा हुने सम्भावना छ। स्ट्यान्डर्ड मोडेल ढिला हुने भए तापनि यो इभेन्ट निकै विशेष हुने अपेक्षा गरिएको छ। एप्पलले यसै कार्यक्रममा आफ्नो पहिलो फोल्डेबल फोन 'आईफोन अल्ट्रा' सार्वजनिक गर्ने चर्चा छ। यस डिभाइसमा ५.५ इन्चको बाहिरी र ७.८ इन्चको भित्री डिस्प्ले रहने र स्क्रिनको क्रिज निकै कम देखिने गरी डिजाइन गरिएको बताइएको छ।
मेमोरी निर्माताहरूको नाफामा आएको गिरावट र एआई सर्भरको मागका कारण चिपको आपूर्ति सन्तुलनमा आउन सन् २०२८ सम्म लाग्न सक्ने पेगाट्रोनको प्रक्षेपण छ। यसले गर्दा आगामी आईफोनहरूको बजार मूल्यसमेत केही बढ्न सक्ने अनुमान गरिएको छ।
